.. بصي يا غنوة مش هنأجوشك في الحكاية دي لان دا يخص زين ومسيرك تعرفيه زين وساعتها هتتشكريني أنا وأبوكي بس دلوجت يا غنوة عشان مصلحتك متجوليش لحد أنك مش موافقة علي الجوازة دي الكل فاهم أنك راضية وهتحبيه كمان
بصتله وانا فاتحة بوقي من صدمة اللي قاله يعني زين ضحك علي الكل عشان يتجوزني غصب ليه كل دا كنت لسه هعترض بس جدو مسمحليش وبصلي بهدوء وثقة
.. بصي يا بنتي كل حاجة هتفهميها في وجتها دلوج هتسمعي كلامي وتنفذيه هتجهزي نفسك ومروة هتنزل معاكي تجيبي كل اللي نفسك فيه الجوازة دي لازم تتم في أقرب وجت ودا لمصلحتنا كلنا وصدقيني مش هتندمي ثقي فيا أنا وأبوكي يا بنتي
الدموع اتملت في عيني حاسة ان حاجة مكتفاني عاوزة أهرب من كل دا ومش عارفة أعتراض حاسة اني عاوزة أكمل عشان بس أفهم كل دا
.. بصي هتفق معاكي اتفاق ادي نفسك فرصة ست شهور مع زين ولو مرتاحتيش معاه أنا هخليه يطلقك بنفسه جلت ايه
بصتله وانا حاسة ان دا طوق النجاة اللي ظهرلي في وسط كل دا حضنت جدو بسرعة وعرفته أني موافقة مع اني كنت شايفه في عينه ثقة أني هكمل بس وافقت وانا عارفة اني مش هستحمل ولا تلات شهور حتي
خرجت من المكتب وانا مش عارفة اللي عملته دا صح ولا غلط بس شايفه ان دا الحل الوحيد دلوقتي بصيت حواليا ملاقتش حد غير مروة ومرات عمي ومعاهم بنت معرفهاش ابتسمت ومشيت بهدوء عشان اطلع أوضتي
.. مشيفناش إياك يا بنت ليلي
استغفرت جوايا الف مرة وانا ببص تاني ليها وبحاول أمسك أعصابي
.. لا شيفاكي دا انتي تملي العين يا طنط بس قلت أسيبكو براحتكو
حسيت كلامي ضايقها بس مهتمتش
.. طب تعالي أما أرفك علي مريم بنت اختي
استغربت إيه الحنية اللي فجأة دي قربت بهدوء ومديت ايدي ليها
.. أهلا وسهلا
مدت إيدها بعجرفة وسلمت عليا وحسيتها مش طيقاني زي خالتها بالضبط هو انا كنت ناقصة حرباية جديدة خرجتني من أفكاري علي سؤالها
.. هي دي بقي مرات زين
.. اه الجمر دي تبقي مرت زين أول مرة هشوف مخدة تشيل اتنين حلوين
بصتلها مريم بنظرات إشمئزاز
.. جمر أخوكي زوجه بجي غريب أوي باينه بقي يحب الرمرمة والله شكل عندك حق يا خالتي
بصتلهم وهما بيبصو لبعض كأنهم متفقين يهينوني كنت لسه هرد عليها بس قاطعني صوت زين اللي جيه من ورايا فجأة
.. باين يا اما إن مريم اللي محتاجة لحكيم يكشفلها نظر..
بصتله مريم بتوتر وقامت
.. أهلا يا زينو مكنتش خابرة أنك هنا
معرفش ليه اضايقت لما لاقتها بتدلعه كدا وليه أصلا تتدلع بالطريقة دي يمكن لاني مبحبش حد يشاركني حاجة تخصني بس هو زين بقي يخصني
.. انا اسمي زين يا مريم وجلتلك ميت مرة مبسلمش ومحدش مسموح له يدلعني غير مرتي وبس ولا إيه
بصيت لمريم ومرات عمي لاقيتهم متغاظين ويمكن قربو يطلعو دخان من ودنهم زي توم وجيري . وطلب من مروة تحصلنا عشان عاوزنا ضروري ودخل معايا فضل يبصلي وبجد نظراته بتوترني بصتله بهدوء
.. شكرا
.. علي ايه
.. أنك كل مرة بتقف في صفي وتدافع عني
وبصلي في عيوني
.. وكرامتك من كرامتي ومقبلش أبدا أن حد يقلل منك يمكن جوازتنا جت بطريقة متعجبكيش بس صدقيني في حاجات كتير أنتي لسه متعرفيهاش
.. ياريت تعرفني بجد يا زين انا دماغي تعبتني من كتر التفكير بس إيه دا أنت بتتكلم عادي زينا
ابتسم ابتسامة حلوة أوي بينت أن عنده غمازة وكمل
.. فكراني أخرس ولا إيه
.. أكيد مقصدش يعني بس انا من ساعة ما جيت وانت بتتكلم صعيدي أول مرة تتكلم زيي هو أنت جيت القاهرة قبل كدا أنت خرجت من المكان دا أصلا قبل كدا
قلتها بشيء من السخرية خلاه يبصلي بصة مفهمتهاش
.. اه أنتي فكراني بقي محبوس هنا وبني آدم جاهل ومعرفش حاجة عن الدنيا بتتفرجي علي التلفزيون كتير أنتي يا بنت عمي
بصيت للأرض بإحراج مكنتش حابة أحرجه كدا كنت لسه هبرر كلامي بس لاقيت مروة بتخبط ودخلت وحقيقي جيت في وقتها
.. إيه جيت في وجت مش مناسب ولا إيه
ابتسم زين وسمحلها تدخل
.. لا يا اختي طول عمرك بتيجي في الوجت المناسب
.. حاسة بتريقة بس ماشي جولي بقي عاوزني في ايه احسن أمك تحت علي نار وعاوزة تعرف عاوزنا في ايه
.. بصي يا غنوة جدي أمر أننا نجهز للفرح كنت عاوز أجله شويه لأجل عيونك بس معلش استحمليني المرة دي كمان فبكرا هاخدك أنتي ومروة ونغم تنزلو تشترو كل اللي تحتاجيه
بصتله شويه هو بجد إزاي حلو كدا فقت علي إيد مروة وهي بتمشيها قدام عيني وبتغمزلي بعينيها
.. نحن هنا إيه
اتحرجت واتكلمت بسرعة من غير ما أفقر في اللي هقوله
.. وانا هجيب اللي أنا محتاجاه هنا ازاي انتو عندكوا أماكن نشتري منها أصلا
بصولي الاتنين باستغراب بس زين فهمني وابتسم
.. مش بقولك بتتفرجي علي تلفزيون كتير احنا في قنا هنا مش في الصحرا يعني في محلات وأماكن هنا أحلي من القاهرة كمان ولو معجبكيش فيه الأقصر وأسيوط وبلاد كتير هتعجبك أوي أنتي بس ادي نفسك فرصة تخرجي من أفكارك دي
ابتسمت بإحراج وهزيت راسي بالموافقة ومروة سابتنا وقالت أنها هتروح لنغم عشان تعرفها ويتفقو سوي وانا عارفة أنها عملت كدا عشان تسبنا لوحدنا والوضع ده بجد بيوترني
.. ممكن أطلب منك طلب
بصتله وانا مستنياه يكمل
.. ممكن بكرا واحنا خارجين تداري شعرك دا
بصتله وانا متعصبة
.. اهو بدأنا
.. بدأنا إيه
.. تحكمات داري شعرك البسي ده متعمليش دا عاوزة أفهمك اني مش كدا ودا استايلي وأظن أنت متفاجئتش بيه
.. كل دا حصل
ابتسم
.. بصي يا غنوة احنا في بلد ليها عاداتها وتقاليدها وأنتي في الأول والاخر مراتي ومتقبليش أن حد يقول اني سايب أهلي بيتي كدا وبعدين دي مش رجعية ولا تحكمات بدليل اني سايبك براحتك هنا ومتكلمتش بس برا البيت لا مش هينفع وعلي فكرة انا راجل غيور ومحبش حد يشوف شعرك ولا يشوفك أصلا
كلامه بيخليني مش عارفة أتكلم بتوتر نظرته فيها حب غريب هو يعرفني أصلا حاولت أستجمع نفسي تاني وقمت من مكاني عشان أعرف أتكلم
.. انا لبسي كدا يا زين ولو مش عجبك نفضها سيرة
.. بصي يا غنوة
إليك النص بعد تنقيحه وحذف الكلمات المخالفة لسياسات جوجل:
.. الحجاب مش بالغصب بس هو فرض وأنا متاكد أنك عارفة كدا كويس وأكيد عمي كلمكو فيه كتير بدليل أن نغم لابساه وأنا مش هغصبك علي حاجة بس أنا من ساعة ما دخلتي البيت دا عمري ما قللت منك ولا ضايقتك ياريت تحاولي تقدريني زي مانا بعمل والقرار في إيدك
سابني مشتتة في أفكاري وأنا حتي مش عارفة أرد كان خارج من الأوضة وقبل ميمشي وقفت وراه وأنا بسأله بحيرة
.. اتجوزتني ليه؟
لف وبصلي باستغراب وبعدين ابتسم وسألني
.. عاوزة تعرفي أسبابي ولا أسبابهم هما
.. ياريت لو تقولي الاتنين
قفل الباب تاني ورجعلي وهو باصصلي في عيني وبيقول
.. عشان أحميكي
بصتله وأنا مش فاهمة
.. تحميني من إيه
