روايات وقصص

حماتى

جريت سامية عليا فجأة ومسكت دراعي بكل قوتها:ـ لأ! الخزنة دي محدش يقرب منها!
سحبت دراعي وقلت:ـ غريبة.. من شوية كنتِ بتقولي إن كل حاجة في البيت بتاعتك، دلوقتي بقيتي خايفة ليه؟
دخل أحمد بينا بسرعة:ـ منى، سيبي الخزنة.
ـ ليه؟
ـ لأنها بتاعة أمي.
ـ وأنا ماقولتش إنها بتاعتي، أنا عايزة أشوف الحاجة اللي تخصني اللي اتحطت جواها من غير إذني.
توترت سامية أكتر:ـ مفيش حاجة تخصك فيها!
ـ متأكدة؟
ـ أيوه!
ـ يبقى مفيش داعي للخوف. فكها.

اتردد العامل، فقلت:ـ تمام، فكها بس.
أول ما اتحرك العامل ناحية أوضة سامية، وقفت قدام الباب:ـ والله لو دخل حد الأوضة دي هطلب الشرطة!
بهدوء قلت:ـ اطلبيها.. ياريت فعلًا تطلبي الشرطة.
ملامحها جمدت. الجارة بصتلها باستغراب، وأخت سامية رجعت قعدت تاني وفضولها غلبها. أما أحمد فكان واقف ساكت وعرقه يصب.
وهنا فهمت.. الخوف مش عند سامية لوحدها، أحمد كمان عارف.
ـ إنت عارف إيه اللي جوه الخزنة، صح؟
ـ لأ. (رد بسرعة زيادة عن اللزوم). ماعرفش.
قربت منه خطوة:ـ بصلي وقولها.
رفع عينه ليا ثانيتين، وبعدين بص بعيد. ضحكت:ـ تمام، يبقى أنا اللي هطلب الشرطة.
صرخت سامية:ـ شرطة إيه؟! إنتِ عايزة تفضحينا قدام الناس؟!
ـ اللي معندوش حاجة يخبيها مش بيخاف من الشرطة.

وقبل ما أكمل الرقم، قال أحمد:ـ استني.
إيدي وقفت، وكلنا بصينا له. بلع ريقه وقال:ـ أنا هفتحها.
صرخت سامية:ـ أحمد!
لف ناحيتها:ـ خلاص يا أمي، الموضوع كبر.
قرب من الخزنة، ومسكت سامية هدومه:ـ قولتلك لأ!
نفض إيدها بعصبية (ودي تقريبًا أول مرة أشوفه بيعترض عليها بجد):ـ أمال نعمل إيه؟! نخليها تجيب الشرطة؟

بصت سامية حواليها.. للعمال، للجارة، لأختها، ثم ليا، وقالت فجأة:ـ كلكم اطلعوا بره.
ـ لأ.. الخزنة تتفتح وأنا موجودة.

دخل أحمد أوضة أمه ودخلت وراه. كانت الخزنة الرمادي الصغيرة مثبتة في الحيطة. قعد قدامها ومد إيده للأرقام اللي كنت حافظاها من إيصال امبارح.
دخل الرقم.. سمعت صوت “تك”.. باب الخزنة اتفتح.
شهقت سامية، وقربت أنا.
في الأول شوفت ملفات، علب دهب، فلوس متربطة بأستك، وأظرف. لكن أول حاجة شدت عيني.. علبة قطيفة حمرا.
قلب دق، أنا أعرف العلبة دي. مديت إيدي وخدتها.
قالت سامية بسرعة:ـ سيبيها!
فتحتها واتجمدت.. الإسورة! نفس إسورة أمي اللي ادتهولي يوم جوازي واللي سامية أخدتها تاني يوم.
مسكتها وقلت:ـ مش دي اللي قولتي إن بنتك أخدتها؟
ما ردتش سامية.

فتحت علبة تانية: حلق دهب. وتالتة: سلسلة. ورابعة: خاتم. كلهم بتوعي! حاجات كنت فاكرة إنها راحت، وكل ما أسأل تقوللي “نسيتي حطيتيها فين” أو “عند أمك” أو “إنتِ مهملة”. لكنهم كانوا هنا.
بصيت لأحمد:ـ كنت عارف؟
ـ والله ما كنت أعرف إن دهبك هنا.
سامية:ـ أنا كنت باحتفظ به!
ضحكت:ـ بتحتفظ به؟! من غير إذني؟! لمدة 3 سنين؟!
اتلخبطت سامية:ـ أصل.. كنت خايفة تبيعيه.

سكتت، وبصيت جوه الخزنة تاني.. وكان ممكن الموضوع يقف عند الدهب، لكن ملف أزرق شد انتباهي عليه اسم أحمد.
طلعت الملف، اندفع أحمد ناحيتي:ـ منى، سيبي الورق ده.
ـ ليه؟
ـ ده ورق خاص.
ـ خاص بإيه؟
سامية:ـ مالكيش دعوة!

فتحت الملف، وأول ورقة خلتني أسكت: كشف حساب.. مش حساب سامية، حساب أحمد.
قلبت الصفحة: تحويلات شهرية منتظمة بعد ما قسط الشقة يتخصم من حسابي بأيام، كان فيه تحويل من حساب أحمد لحساب أمه بمبالغ مختلفة.
سنة.. سنتين.. نفس الحكاية.
رفعت عيني لأحمد ووشه كان أبيض:ـ إيه ده؟
ـ دي فلوس أمي.
ـ لأ.. دي تحويلات منك ليها كل شهر تقريبًا.
سكت. قلت:ـ يعني إيك كان معاك فلوس، وفي الوقت اللي بتقولي فيه إن مرتبك خلص وإني لازم أدفع القسط، كنت بتحول جزء لأمك؟!
دخلت سامية بسرعة:ـ وهو حر! دي فلوس ابني!
ـ طبعا هو حر، وأنا كمان كنت حرة في فلوسي، بس هو كان بيقولي إن مفيش معاه فلوس للقسط!

وبصيت لأحمد:ـ فاكر لما أخدت من تحويشتي مقدم العربية؟ قولتيلي إيه؟ معاياه.
ـ فاكر لما دفعت مصاريف علاج أمك؟ معاياش.
صوتي بدأ يترعش من الغضب:ـ ولما كنت بطلب تساعدني في مصاريف البيت؟ تقولي مرتبي بيطير! طلع ماكنش بيطير، كان بيتحول!
أحمد:ـ أمي كانت تحوشهم.
ـ إيه؟!
بص لأحمد لأمه وقال:ـ كانت تحوش الفلوس لينا.
صرخت سامية:ـ اسكت يا أحمد!
لكن الكلمة خرجت.. تحوش!
بصيت للخزنة، للفلوس، لأحمد. وفجأة حاجات كتير ركبت فوق بعضها:ـ تحوشهم ليكم ليه؟
ما ردش أحمد. مسكت ملف تاني: ورقة حجز وحدة سكنية.. شقة جديدة باسم سامية، ورقم الموبايل المسجل للتواصل هو رقم أحمد، وتاريخ الحجز من 8 شهور!
شقة تانية؟!
سامية:ـ دي حاجة تخصني.
ـ وأنا ما سألتكيش، سألت جوزي.. إنت كنت بتحوش مع أمك عشان تشتروا شقة تانية؟
سكت.
ـ وأنا هنا بدفع قسط الشقة دي؟ وبدفع الكهربا والمياة والأكل؟! وإنتوا بتحوشوا مرتبك عشان تشتروا عقار تاني باسم أمك؟!
انفجر أحمد:ـ كنت عايز أأمن مستقبلنا!
ضحكت:ـ مستقبل مين؟! مستقبلنا إحنا؟ أمال ليه باسم أمك؟
ما عرفش يرد.
سامية:ـ عشان لو حصل اللي بيحصل دلوقتي!
لفيت ناحيتها.. الجملة خرجت منها من غير ما تحس وسكتت فورًا، لكن خلاص، اتقالت!
قربت منها:ـ يعني كنتوا حاطين احتمال إني أطلب الطلاق؟ وكنتوا بتخلوا الفلوس والأصول باسمك عشان لو مشيت ماخدش حاجة؟
سامية:ـ أنا ماقولتش كده.
رفعت موبايلي:ـ بس التسجيل قال.
وشها وقع، وحط أحمد إيده على راسه:ـ يا أمي..
لكن أنا كنت خلاص بطلت أسمعهم.

رجعت للخزنة، وكان فيه ظرف أبيض في الآخر مكتوب بخط إيد سامية: “منى”.
مدي إيدي، فاندفعت سامية:ـ لأ!
لكن المرة دي أحمد وقفها.
فتحت الظرف، كان جواه ورقة واحدة وقائمة: الإسورة، السلسلة، الحلق، الخاتم، وتحتهم أسعار تقريبية، وفي آخر الورقة جملة: “يتم بيعهم عند الحاجة لاستكمال دفعة الشقة الجديدة”.
حسيت إن نفسي وقف. بصيت للدهب.. دهب أمي ودهبي.. كانوا ناويين يبيعوه مش يحافظوا عليه، كانوا حاطينه احتياطي عشان يكملوا شقتهم الجديدة.
رفعت الورقة:ـ لسه هتقولي بتحافظي عليه؟
سكتت سامية.. المرة دي مفيش إجابة ولا حتى كذبة.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى