النهارده هعرف مين فيكم اللي شيطان ومين اللي ملاك!
مرت تلات أيام كأنهم تلات سنين، مكنتش بدوق فيهم النوم، ولا كنت قادرة أبص في وش ابني اللي كان ذنبه الوحيد إنه جه للدنيا دي. وفي اليوم الرابع، رجع أحمد والتقرير في إيده. فتح الباب ودخل، وشه كان خالي من أي تعبير، هدوء مخيف يسبق العاصفة.
حدف التقرير في وشي وقال ببرود قاتل
التحليل أثبت إن الولد ابني فعلاً.. معجزة طبية بنسبة واحد في المليون.. ربنا أراد يديني الولد من صُلبي بعد سنين العقم.. بس ربنا كشفلي كمان حقيقتك.. كشفلي إنك شيطانة خربتي بيت واحدة اتنازلت عن أمومتها ودارت على عيب جوزها وعاشت تخدمه وتربي يتامى علشان تحافظ على كرامته قدام الناس.
اتنفست الصعداء للحظة وقلتله وأنا بعيط
الحمد لله.. يعني صدقتني؟ أنا بحبك وعملت كل ده عشان تفضل معايا أنا وابنك..
قاطعني بضحكة ساخرة وموجوعة، وقال وهو بيبصلي بقرف
أنا طالقتك يا هدى.. طلاق غيابي عند المأذون قبل ما أجي. وأنتِ والولد مالكمش مكان هنا. أنا هدور على مراتي وبناتي لو هلف
عليهم الدنيا كعب داير، هبوس تراب رجلين الست اللي صانتني وصانت سري، وأنتِ اطلعي برة بيتي.. برة حياتي.
لميت هدومي والدموع عامية عيني، وخرجت من الشقة وأنا شايلا ابني على كتفي، نزلت السلم وبصيت لشقتها اللي تحت.. كانت ضلمة وفاضية، واقتربت من بابها واقتكرت يوم ما باست إيدي وقالتلي حرام عليكي. حسيت ساعتها إن ذنبها ودموعها بدأوا يتردوا ليا في نفس اللحظة.
خرجت للشارع في نص الليل، الهوا كان ساقع، والولد بدأ يعيط بين إيديا.. ومكنتش عارفة هروح فين، ولا مين هيسترني أنا وابني في وقت متأخر زي ده. تذكرت جملتها الأخيرة مليش حد في الدنيا.. ومحدش هيسترني. ودلوقتي، أنا اللي بقيت في الشارع، من غير سند، ومن غير زوج، وبإيدي اللي خربت بيتي بإيدي.
الجزء الثالث التائهون في ممر العدالة
خرجت للشارع المظلم، الهوا الساقع كان بيخبط في وشي وكأنه بيجلدني على كل لحظة ظلم ظلمتها للست دي. ابني سيف كان بيصرخ بين إيديا من البرد والخوف، وأنا مش عارفة أروح فين. أهلي ناس على قد حالهم في محافظ تانية، ولو رحتلهم بالفضائح دي وبأني اطلقت وطُردت في نص الليل، هكون مكسورة الجناح قدام الكل.
قعدت على رصيف في آخر الشارع، وضامة ابني لصدري وأنا ببكي بحرقة. كل دمعة نزلت من عين مراته الأولى كانت بتتحول دلوقتي لسهم في قلبي. افتكرت لما كانت بتقولي أنا مستعدة أكون خدامتك، ودلوقتي أنا مش لاقية مكان يحميني أنا وابني اللي كنت فاكرة إنه هيكون حصني المنيع وسندي في الدنيا.
مرت الليلة دي كأنها سنة، قضيتها في لوكاندة صغيرة وبسيطة نزلت فيها مؤقتًا بفلوس دهبي اللي كانت معايا. كنت ببص لسيف وهو نايم، وبسأل نفسي الذنب ذنبي أنا، بس الواد
ده ذنبه إيه يعيش مشرد وأبوه يرميه الرمية دي؟
في نفس الوقت، كان أحمد عايش في جحيم تاني.
ما قعدش في البيت دقيقة واحدة. بدأ رحلة البحث عن مراته الأولى أسماء وبناته. راح للملجأ اللي كانت أسماء متبنية منه البنات، وراح لبيوت بعض معارفها القدام اللي كانت تعرفهم قبل ما تتقطع صلتها بيهم. كان بيمشي في الشوارع زي المجنون، ماسك صور البنات وصورتها، بيسأل وبيدور في كل مكان.
ندمه كان بياكل في قلبه. كان بيفتكر إزاي هي استحملت نظرات الشفقة من الناس، وإزاي دارت على عيبه وعاشت معاه تخدمه وتربي بنات مش من دمها بس عشان تستر سري وتحميني من كلام الناس وعيرتهم. كان بيقول لنفسه
أنا ضيعت الملاك اللي صانني، ومشيت ورا الشيطانة اللي خربت بيتي.
بعد أسبوعين من التدوير، تليفون أحمد رن. كان واحد من أصحابه القدام بيقوله
أحمد، أنا شفت أسماء والبنات في منطقة عشوائية على أطراف القاهرة، شغالة في مشغل خياطة صغير، وقاعدة في أوضة فوق السطوح.
أحمد ما كدبش خبر، طار بالعربية للمكان. لما وصل ودخل الحارة الضيقة، طلع السلم المهدود لحد ما وصل للسطوح. شاف الباب موارب، وبص من الشق.. شافها قاعدة على مكنة الخياطة وعينها مجهدة، والبنات حواليها بيذاكروا على نور لمبة ضعيفة.
فتح الباب ودخل وهو بينهج، ودموعه سبقت كلامه. أول ما شافته، وقفت مصدومة، والبنات جريوا استخبوا وراها وخايفين.
وقع أحمد على ركبه قدامها، وبكى بصوت مسموع وقال
